أسرار مصرية

نفسك تخطفلك داى يوز فى بورتو السخنة ومش عارف ممكن تعمل ايه  هنقولكم على برنامج رائع فى بورتو وكمان هنعرفكم الطريق للعين السخنه تروحه ازاى واسعار رحلة التلفريك

لو مش عارف تاخد اجازة طويلة للسفر ونفسك تقضى يوم مليان حركة وتستمتع ببرنامج ترفيهي رائع  فى بورتو السخنة احنا عملنالك برنامج رحلة لبورتو السخنه هتستمتع فيه باجمل المناظر الطبيعية والخلابة و الاماكن الساحرة من حيث الهدوء و روعة المكان .

 برنامج رحلة لبورتو السخنة porto Sokhna :

- بداية الرحلة من أول ما تمسك طريق السخنة الجديد وتاخد قهوتك من أول بنزينة ع الطريق وتتجه بقى لبورتو السخنة

-الطريق من البوابة للبوابة ساعه تقريبا وكارتة الطريق 10 جنية .. عديت البوابات خش يمين على طريق الغردقة و أستمتع بمنظر الجبال مع المياة لغاية لما توصل بورتو

- وصلت بورتو التسكين هيكون فى الفندق الساعه 12 ظهرا 

- لو انت رايح مع اصحابك او مع عائلتك هيكون كل 5 أفراد في شاليه خاص بيهم مكون من غرفتين وحمامين ومطبخ وريسبشن للراحة والاستجمام 

-الشاليه هتلاقيه بيطل على حمامات سباحة

-الشاطئ الخاص لبورتو السخنه متاح نزول المياه فيه  وموجود فيه ألعاب مائية هتقضى فيه احلى Fun Day 

- كمان فيه ملاعب كرة قدم وطائرة عشان تنطلقوا براحتكم 

- ممكن كمان تستمتع هناك برحلات السفارى (  قعده عربي - حفلة دى جى - ركوب خَيل - بيتش باجى )

ملحوظة :
من ضمن الاماكن فى بورتو السخنه هى مشاية بورتو .. من احلي الأماكن في السخنة ويعتبر الممشي الوحيد لأي حد في السخنة بليل .. المشاية دي عاملة زي خليج نعمة بالضبط. كلها كافيهات والعاب للأطفال وسينما ومول وسوبر ماركت اولاد رجب و محلات كتير فيها كل الأنشطة .

احلى منطقة في بورتو السخنة هي الأهرامات اولا شققها كلها بتشوف البحر وحمامات السباحة حسب زاوية الشقة ومجهزة بكل شيء تتوقعة والنظر من بلكونة الشقة غاية في الروعة وكل حاجة تحتك علي طول .

انما لو حبيت تقعد في فندق بورتو يبقي اضرب السعر في 3 عطول لأنة غالي جدا و خصوصا لو خميس وجمعة

فنصيحة خد في الشقق الفندقية افضل واسعار المطاعم مش غالية قوي زي مانت متخيل يعني الاسعار من اول 50 جنيه وانت طالع

كل الأنشطة متاحة على البحر .

السفاري موجود كمان وسط الجبال بالبيتش باجي . 

في هناك حاجة اسمها كهف الملح مكان تطلع فية اي طاقة سلبية في جسمك

طبعا غير الحفلات اللي بتعملها الكافيهات في المشاية 

من الأخر هاتنبسط في بورتو

كهف الملح 

طب كدا الداى يوز هيكون خلص ؟ لا لسه ..  

فى كمان حاجة مميز اوى ف بورتو السخنه مش موجودة فى اى مكان تانى وهو : 

التلفريك 
التلفريك فى ناس كتير متعرفش أنه موجود فى مصر وبالتحديد فى العين السخنة ولسة كمان هيبقى فى تلفريك تانى فى منطقة الجلالة

احنا هنكلمكم عن المعلومات الكاملة للتلفريك واسعاره  واللى ممكن تكون نشاط اضافى معاك فى برنامج  رحلتك ولو حابب  ممكن يكون وسط اليوم مع حاجات تانية بس الواحد ميروحلوش مخصوص
يعنى تبقى رايح تقضى اليوم وتاكلك أكلة سمك سواء عند التلفريك فى مطعم حلقة السمك أو حتى عند الناس اللى على طول ساحل العين السخنة

التليفريك بيوديك الي اعلي قمة الجبل فى السخنة وبتشوف منظر ولا اروع من كدة بيبقى قدامك الجبال مع البحر في منظر خلاب

لو رايح بورتو بالعربية هتركن العربية سواء فى الجراج تحت او عند المطعم فوق الاتنين واحد أنت كدة كدة هتركب من اى محطة فى الاتنين.

 رحلة التلفريك الفرد بيكون ب 85 جنية ذهاب وعودة

اسعار الاطفال فى بورتو السخنة : حتي 12 سنة ب 45 جنية و الاطفال الاقل من 2 سنة مجانا

المواعيد بتاعت التلفريك بتبقى من 1 لغاية 6 مساء ( حاول تخلى رحلة فى النور ورحلة فى المغرب هتتبسط أوى )

المسافة اللى بتقطعها فى التلفريك هي تقريبا 1 كيلومتر ومدة الرحلة 10 دقائق تقريبا ذهاب و 10 دقايق عودة

طب احنا كده عرفناكم ايه اللى ممكن تعمله فى بورتو السخنه خلينا نكلمكم بقى عن الطريق الى العين السخنه 

طريق العين السخنة 

- طريق العين السخنة من اجمل الطرق فى مصر عشان متسفلت ومظبوط فى كل حاجة

السرعة القصوى المسموح بيها 120 كيلو متر بحد أقصى وفى ردار خد بالك  عشان كدة ياريت متفتحش اووى وكمان فى لجان على الطريق بتراقب سرعتك لان المخالفة بتكون فورى 

الطريق كلة جميل المشكلة كلها اخر 30 كيلو من بورتو سخنة الطريق هنا صعب شوية لانة بيضيق بيكون رايح جاى وبدون فواصل فياريت تتحرك هناك بسرعة قليلة عشان سلامتك .

زاى تروح العين السخنة 

بص يا سيدى 

لو انت من بورسعيد او اسماعيلية او السويس هتاخد طريق السويس الغردقة وهتلاقيها بعد 70 كيلو تقريبا

لكن لو انت من سكان القاهرة والأقاليم المحيطة بها فطريق الوصول ليها عن طريق - القطامية العين السخنة - وده اوله من على الدائرى الشرقى بعد كارفور المعادى ب 2 كيلو وانت رايح على القاهرة الجديدة

لكن لو انت جاى من الناحية التانية من الدائري الغربي (اسكندرية زراعى - الخصوص - السلام - اسماعيلية زراعى ..الخ الخ الخ) فبعد ما تعدى من تحت نفق السلام بحوالى 25 كيلو تقريبا هتلاقى اليفط الارشادية اللى على الطريق بتدلك على مكان النزلة يمين وتاخد الصينية وتخش من تحت الدائرى .

 نظام الحجز فى بورتو السخنة

عشان تحجز فى بورتو سخنة قدامك طريقتين : 

-الحجز عن طريق مواقع الانترنت زى بوكينج وغيرها 

- الحجز عن طريق الهوت لاين لبورتو سخنة Porto Sokhna hotline

وتليفون بورتو السخنة هو  19156

و بتتصل وتحجز عادى جدا وتختار اليوم اللى يناسبك والاسعار تختلف باختلاف المواسم يعنى

 لو عاوز سعر حلو ابعد عن الصيف والمواسم غير كدة الاسعار بتكون معقولة جدا

تعرف علي :

افضل الفنادق الموجوده بالسخنة واسعار قضاء داى يوز رائع فى العين السخنه ,,

زائرنا الكريم : رجاءآ لاتنسى الاشتراك بقناتنا تشجيعآ لنا لتقديم الافضل وحتى يصلك كل جديد

  

شكرا لك .. الى اللقاء 

*

*