أسرار مصرية

علشان مطروح بلد جميله جدا ومياهها اول مره فى حياتك تشوف فى نظافتها.. والمدينه نفسها نظيفه ومنظمه  وكمان  فيها انشطة كتيرة ممكن تعملها هناك دة غير ان اهلها مش هتلاقى احسن منهم احنا هنكلمكم فى المقال دة باستفاضة عن مرسي مطروح 

هنعرفكم اسعار كل حاجة فى مطروح تقريبا بدايةً من المواصلات ومواعيد حجز القطارات من القاهرة لمطروح واسعارها واسعار الشقق وارقام السماسرة  وكمان الخروجات والانشطة فى مطروح عشان اللى رايح الصيف دة يكون معاه الخلاصه 

ودة افضل دليل اسعار بكل حاجة  فى مطروح .. 

تعرف على اسعار المواصلات الى مرسى مطروح بمختلف انواعها ومواعيدها - اسعار الشقق والفنادق وارقام السماسرة -اسعار الانتقالات الداخليه والشواطئ وكيفية الوصول اليها - وهنكمكم كمان عن افضل الخروجات فى مطروح

واهم حاجه طريقه السفر لمطروح ومواعيد القطارات.
اول حاجه السفر ودا المشقة فى الرحلة كلها لانها 7 ساعات

1- المواصلات لمرسي مطروح واسعارها بالتفصيل

هتركب قطار عادي من محطه رمسيس ب25ج  لغاية مطروح ..بيطلع الساعه 7 وتلت من رمسيس بيوصل على  5 المغرب 

وفي قطار مكيف ب 80ج درجه تانيه وفيه درجه اولي ب 115 ج ودول فى قطار واحد بيطلع من القاهره الساعه  6 الا ربع 

وفيه قطار نوم بس دا الفرد ب 180 ج والغرفه ب 360 ج.

الاتوبيس go bus ب 180 جنيه

بس قطار النوم افضل بكتيير سريرين وبطاطين وحوض مياه ومصدر كهرباء وإضاءة منفصلة لكل سرير وتكييف خاص بالغرفة وسهل التحكم فيه و بوفيه لكل عربية وحمامين ف كل عربية حاجة اكتر من ممتازة

للمعلومة : قطار النوم بيقوم من مصر الساعة 11:30 بالليل ايام .. السبت والاثنين والاربعاء فقط 
والعودة من مطروح ايام .. الاحد والثلاثاء والخميس فقط الساعة 10:00  بالليل

بس لو هتحجزوا لازم يكون الحجز قبلها ب 6 ايام يعني مثلا لو كنت مسافر يوم الاحد ..لازم تحجز يوم الاتنين اللي قبليه والحجز بيفتح الساعه 5 الفجر ...ولو فى عز الصيف ..ممكن تروح للراجل الساعه 7 الصبح يقولك الحجز خلص ..لانهم بيكونوا محددين ياخدوا كام واحد من كل محافظه يعني مثلا القليوبية بياخدوا منها 30 واحد بس .

ملحوظه صغيره ...ان الراجل اللي واقف على الشباك لو قالك الحجز خلص اديلوا 20 ج هيقطلعلك التذكره على طول
واول ما توصل هناك ..اقطع تذكرة عودة علشان متبهدلش 

ولو هتركب سوبر جيت بلاش تحجز تبع شركة وسط الدلتا ..
والمهم ان تذكره السوبر جيت ب 130ج او 150ج وفيه ب 180ج علي حسب الشركه اللي انت بتحجز معاها والميكروباص  ب  80ج او 90ج ...

2- اسعار السكن والاقامة فى مطروح 

هتوصل مطروح وتشوف شقه ف منطقه اسمها العوام ودي قلب مرسي مطروح ووسط البلد و انظف منطقه فى مطروح وكل الخدمات والمحلات موجوده فيها ..
طب انا اضمن منين ان الاقي سمسار كويس ومش يضحك عليا ..بص يا سيدي فيه واحد من اصحاب املاك ف مطروح ومش سمسار اسمه كرم ناصر وساكن ف شارع السوسنسيه وهيجبلك اسعار كويسه جدا جدا ودا رقمه : 010685300080

وفيه كمان سواق السوزوكي واسمه محمد علي ودا بقاله 15 سنه عايش ف مطروح ومعاه عربيه بياكل منها عيش ودا ف غايه الاحترام ..لو كلمته علي شقه هيجبلك شقه ومش هياخد منك حاجه ودي خدمة بيقدمها لله وده رقمه : 01205851589

نرجع تانى لموضوعنا وهو ان اول ما تنزل من المحطه هتلاقي ناس واقفين بالعربيات والتكاتك ويقولك شقه يا بيه شقه يا فندم . سيبك من كل دول ...علشان اكيد يطلعوا من وراك بمصلحة ويودوك مكان بعيد عن العوام ...

انت هتاخد تاكسي وتقوله نزلني عند فندق القصر واديله 15ج ..المهم هتنزل هناك هتلاقي مباني كتير ...اسال على اى شقه هتلاقي ناس سماسرة كتير وهيجبولك شقق كتير ..ارخصهم هتلاقيها ب 150ج الليله .. لو شباب مع بعض هتلاقي التكلفه قليله .

وفيه فنادق كتير هتلاقيها هناك ..بس الاسعار ب 350ج الليله ..المهم ان المكان دا بيبعد عند العوام  10 دقايق مشي.واقل كمان ..ومش محتاج مواصلات وفيه كل حاجه موجوده حوليك .من الاخر منطقه حيوية جدا .. 

3- الشواطئ في مرسي مطروح

هتحط شنطتك وتنزل على الشواطئ الموجودة على البحر ..زي العوام وليدو والبوسيت والفيروز .
الشواطئ كلها ببلاش ومفيش رسوم دخول ليها وهتلاقي الميه بتاعته كويسه 

تاني يوم لو كنتوا مجموعة ممكن تتفقوا مع عربيه سوزوكي ويوديكم الشواطي اللي فى مطروح .

زي ايه مثلا

زي شاطئ روميل ودا الميه هاديه عامل زي حمام السباحة بالضبط والميه نضيفه فيه جدا

شاطي الابُيض ودا الميه بتاعته امواج وهتلاقي ليه 7 شواطئ وكلهم ميه واحده ..احسنهم زمردة والاصيل والاصلي .

شاطي الغرام بتاع ليلى مراد ودا الميه كويسه فيه 

شاطي كيلوبترا ودا ميه هاديه بس نص نص ...وفيه العاب زي البانانه بوت ودا الفرد ب25  ج

موتوسيكل البحر ودا الربع ساعه ب 200ج 

والباراشوت ودا موجود ف شاطي العوام والربع ساعه ب 300ج والبدلات ودا الربع ساعه ب 50ج

شاطي مينا حشيش ودا يبعد عن البلد 20 كيلو ومحتاج مواصلة مخصوص .

وفيه شواطئ تانيه كتير بس دول احسن الشواطئ 

 

4- اماكن التصوير والخروجات فى مطروح وازاى توصلها

1- حمام كليوباترا ودا عند شاطئ كليوباترا و الحمام دا عباره عن صخره كبيره وفيها حمام فى النص ودا كانت كليوباترا متعودة تأخذ حمامها فيه يوميا 

2- شاطي عجيبة ودا من جمال الخالق واعجاز ربنا ف الشاطئ دا ..خيال ولازم تروحها تتصور فيها بس كلها صخور ومينفعش حد ينزل فيه علشان ميتعورش متقلدش الناس اللى بتنزل فيه عشان اكيد بيطلعوا باصابات

3- كهف الملح ودى حاجة لسه فاتحة جديد فيها أكثر من 155 طن ملح من أكبر كهوف الملح اللي من صنع الانسان من حيث المساحه

سعر التذكرة 125 جنية لمدة 45 دقيقة

الفكرة من الكهف الاسترخاء وخروج الطاقة السلبية  ، فكرة الملح واليود والاسترخاء علي الشازلونج وصوت الموسيقي معمول بنظام معين متعرفش الصوت جاي منين كل دة لية تأثير 

بالإضافة لدفن رجلك في الرمل وفية ناس بتدفن جسمها ويعتبر من افضل وسائل العلاج الحديث من استخراج الطاقه السلبيه والضغوط النفسيه و حساسيه الصدر والجيوب الانفيه والغده الدرقيه .

مركز للاستشفاء والاستجمام يعتمد على استخدام المادة الخام الملحية التى تحتوى على العديد من العناصر الطبيعية مثل الصوديوم واليود والحديد و الماغنسيوم.

 المكان : شارع البوسيت --مرسى مطروح

**علشان اللي هيسال اروحهم ازاي الاماكن دى

كهف الملح مخصوص...

فيه شركه سياحه اسمها ابو موت لليخوت والسياحه وودي موجوده عند المينا اللي عند حلقة السمك ودي بتطلع رحله اليخت..مارسيليا اكوا بارك ب25ج رايح جاي بدون التذكره طبعا
و 25 ج رايح جاي القريه البدويه

وبالنسبه للشواطئ .. لو انتوا مجموعه اتفقوا مع عربيه توديكوا وتجيبكوا ..لانكوا لو خدتوها مواصلات عامه .هتلاقيها اقل حاجات بسيطه من المخصوص ..بس الأهم بقا ان فيه مواصلات عامه ..يعني ميكروباصات واتوبيسات من عند امن الدوله بتروح ...الغرام ب 5ج وعجيبه ب 10ج والابيض ب 7ج ..يعني متقلقش من المصاريف

وبخصوص اسعار الشماسي ايجار الشمسيه واربع كراسي ..متحدد من المحافظه ب 50ج ..بس الناس اللي على الشاطي لازم يزودوا عليك شويه ..اللي يقولك 60ج واللي يقولك 100ج ..من الاخر خدها على 50ج ولو رخم معاك قوله انا شايف التسعيرة وانا داخل

وقريت ارقام التليفونات اللي على اليافطة ولو مش عجبك اتصل بمدير الشاطئ دلوقتي ..وهتلاقيه يجيب ورا ...

ملحوظه ..احنا معانا ارقام سماسرة فى مطروح كويسين وممكن تحجز معاهم بالتليفون 

فى واحد اسمه : ابو حمزة دة رقم تليفونه … 01023583449 ودة رقم سمسار تانى بردو : 01004007846
ودة رقم شركه السياحه بتاعت اليخت : 01270441394 

 

4-القريه البدويه ودا فيها قعده بدوي ومسرح وحمامات سباحه والبحر قدامك وحاجه جميله كدا ..

4- مرسيليا اكوا بارك ...ودي الفرد ب 140ج وفيه ملاهي العاب مائية ومحتاجه يوم لوحدها 

5- رحله اليخت ودي فيه منها رحلتين ..الاولي لمده ساعة لف فى الميه ب  40ج 
التانيه ب 60ج لمده ساعتين ..ساعه لف ف البحر والساعه التانيه نزول ف البحر وانت معاك الايف جاكت .يعني متقلقش من المايه خالص .

6 -طريق الكورنيش ودا فيه كل حاجه انت محتاجها .
فيه السيرك بتاع جمال الحلو ودا ب 50ج التذكره وفيه ب60ج و70ج وب80ج وب90ج والvipب 100ج

وفيه سينمات هناك ..وفيه منهم صيفي وفيه صاله ..زي سينما اسمها سينما السلام الصيفي ..وسينما الغرام الصيفي وسينما الفيروز ودخول اي حفله منهم ب 20 

7- متحف الاثار بمطروح ومكتبه مصر العامه ودا عند أمن الدوله

والتذكره للطلبه 10ج والعاديه ب20ج مكان كويس من جوه 

8- شارع اسكندريه ودا احلي واشهر شارع موجود وفيه محلات اكل كتير ومحلات سمك كتير ومحلات ملابس وكل ما تشتهي الانفس هتلاقيه موجود ف الشارع دا

9_ جيلاتي عزة ..بس دا مش مكان يتخرج فيه ...بس اهم حاجه تعملها لما تيجي هنا لانك لو اكلتوا مره ..مش هتسييب يوم الا لما تجيب منه 

واخيرا بالنسبه لاسعار المواصلات المخصوص بس للسوزوكي 

شاطئ منيا حشيش ب 120ج رايح جاي
شاطئ الابيض ب 130ج رايح جاي
شاطئ عجيبة ب 200ج رايح جاي
روميل 60 رايح جاي
كليوباترا ب 80ج رايح جاي 

-لو تاكسي هيكون اقل من كدا ب 20 او30 ج

بس توضيح للاسعار ..احنا كاتبين الاسعار ديه وهى خاصة بمنطقه مطرفه شويه قريبه من كليوباترا وعجيبه والغرام... ف لو حد اتصل بالسواق وهو ساكن ف العوام او منطقه تانيه ..هتلاقيه هيزيد شويه ..

مقال فرعي : فسحتك علي النيل لقضاء وقت مميز مع اطلالات فريدة في أفضل المطاعم والكافيهات

زائرنا الكريم : رجاءآ لاتنسى الاشتراك بقناتنا تشجيعآ لنا لتقديم الافضل وحتى يصلك كل جديد

  

شكرا لك .. الى اللقاء 

*

*